《奇形怪狀CV系列之咩都想做》
話說今日睇左成堆CV，終於搵到幾份啱駛。諗住約佢地上嚟傾下啦，好彩睇真D，有一份個email標題寫住申請職位A，cover letter就寫職位B喎。唔緊要! 皇呀姐話依家正是朝廷用兵之際，打電話俾佢問清楚咩底細先。
「喂！先生！我地係薯仔公司打嚟，收到你份CV想申請職位A, 但又見到你cover letter申請職位B, 你其實想申請邊個呢？」
「err...係咩？其實兩個我都有興趣」
「咁你知唔知呢兩個職位嘅工種好唔同？」
正如一份工係做清潔嘅，另一份工係做Marketing嘅，你唔好話我知對兩份工都一樣咁有興趣呀？應該會有priority掛？
「err...唔知呀..其實我都唔係好知做咩…你可唔可以話返俾我知？」
聽到依句，我心入面已經唱緊「我是憤怒」！
「你可以上網睇返，知道想申請邊份先打俾我。」
嗱！依種就係我之前介紹HR最怕見到嘅求職者「勁懶蟲」喇！講到呢度基本上已經唔駛in喇，CV寫錯一般都已經未必會搵你，連自己申請個職位都唔知做咩更加係死罪。
大家記住寫CV小心啲，我仲見過有啲寫錯死對頭公司名，情況就好似麥當當叔叔去KFB見工時講「I'm lovin it!」，但係唔知人地搵橡膠穎sell緊「238 xxxxx call我啦！」。聽到依句，真係唔使再call返你啦。雖然人有三急，send CV有時都會急。睇清楚啲，無謂錯失面試機會呀。
嚴禁非法轉載
Copyright © HR小薯蓉. All rights reserved.
Search